Na Uakoko Chong, Hui Mālama i ke Ala ʻŪlili
Mai ka hikina a ka lā ma Hawaiʻinuikuauli a hiki loa aku i ka welo a ka lā ma nā pali kahakō o Nīhoa, iā ʻoukou kēia welina o ke aloha.
I ka hala ʻana o kēia mau malama ʻo laʻa ua ma Hāmākua nei, ua kilo mākou, ka Hui Mālama i ke Ala ʻŪlili, i ka huli o ka lani, ka huli o ka honua, a me ka huli o ke kai. Moe pono ʻole ko mākou pō i ka ua loku o ke ao polohiwa, ka ʻō ʻana o ka uila, a i ka nākolo o ka hekili. Leha aʻela nā maka i ka pua ʻana o ke ahi o uka, o Mokuʻāweoweo, a me ke kūʻena o ka pele e kahe ana ma Mauna Loa. Paʻē maila ka ʻolēʻolē hala ʻole o ka leo nalu nui i nā kumu pali, ʻalawa ihola nā maka mai ka pali lele koaʻe i ka imu puhi o ke kai, a ʻike mākou, ua hoʻi mai ka iʻa nona ka lā, ʻo ke koholā.
Ma kēia mau huli ʻana o ka ʻāina e kū ana i ka maka, ma hea hou aku kahi imu puhi? Aia nō paha i uka, i kahi e hoʻoulu ʻia ai ka ʻai a me ka iʻa. Wahi a ke kupuna, “na ke kanaka mahiʻai ka imu ō nui.” ʻO kekahi manaʻo mai kēia ʻōlelo, ʻo ka imu ō nui ke hōʻike mai, na ka lima huli i lalo i ka ʻāina ka ʻai a me ka iʻa e haka ʻole ai ka lua imu. He wā nō ko kēlā lā kēia lā e mahi ai i ka ʻai. Ma ka hana liʻiliʻi ʻana ma kou wahi kīhāpai e ulu ai a lau ai ka hua o ka ʻai.
ʻO ia nō kā mākou ma Paʻauilo a me Koholālele, ka hoʻokō ʻana i nā hana liʻiliʻi e hua ai ka ʻai i kēlā me kēia lā ma ka waele nāhelehele ʻana, ma ka hoʻopulu ʻana i ka mea kanu, a me ke kanu ʻana i nā mākālua. Ua hele a maʻa ka lima i ka huli ʻana i ka lepo o ka ʻāina me ka hoʻomākaukau ʻai. Ke ahu ka imu a ʻenaʻena ka pōhaku, ʻākoakoa nō hoʻi nā lima mākaukau e hana maiau a maʻemaʻe ma ka hoʻomākaukau ʻai. Hoʻomoe ʻia ka ʻai a me iʻa ma ka imu a moʻa. I ka huʻe ʻia ʻana o ka imu, ʻaʻohe kanaka hele wale. Paʻa ka pūʻolo ʻai ma ka lima me ka paʻapū o ka lole i ka uahi. Hū ka ʻono o ka imu puhi!
No laila, e oʻu mau hoa e mahi ana i kēlā peʻa kēia peʻa o ka ʻāina, mai nā kualono a nā makalae, e kahu mau i ke ahi o kō wahi imu, no ka mea, ke ʻono nei kākou i ka ʻai a me ka iʻa a ke kupa o nei ʻāina. E huliāmahi like kākou!
